Scribbling

by a beautiful heart -

maeN to apna wajood Dhondati hooN
din kay is baywafa ujalay maeN
chaand ki ghumshuda si kirnooN maeN
maaN ki mamta maeN aur lori maeN
baap kay saibaan aaNgan maeN
bhai ki sher si kalai par
maeN to apna wajood dhondati hooN

mujh ko takhleeq karnay walay sun
maeN bhi takhleeq karnay wali hooN
aey zamanay tujhay khabar hi kiya
maeN hi dunia basanay wali hooN
par zamanay tujhay nahiN maloom
karb-e-takhleeq karb hai kaisa

janm lenay say pehlay hi maeN tou
apnay astitv ko gaNwati hooN
maeN agar janm lay bhi loon tab bhi
paida hotay hi dafn hoti hooN
ya to bazaar kay yeh bazaari
baich daitay haeN mujh ko biyopari
behn hooN maaN hooN ya maeN beTi hooN
phir bhi tasweer baybasi ki hooN
par zamanay tujhay khabar kiya maeN
apna astitv pana chahti hooN
zinda rehna azaab hai mujh ko
aur maeN zinda rehna chahti hooN